Italia është një nga mbështetësit kryesorë të aspiratave evropiane dhe euroatlantike të Maqedonisë së Veriut dhe e mbështet vendin në proceset reformuese të nevojshme për arritjen e këtyre synimeve dhe me pjesëmarrje aktive në fushën e IPA-s. Kontributi i sinqertë dhe i fortë i Italisë për vendin i ka rrënjët në bashkëpunimin ndërinstitucional, forcimin e demokracisë në vend dhe reformat strukturore, veçanërisht në fushat e sundimit të ligjit, pavarësisë dhe autonomisë së gjyqësorit, luftës kundër korrupsionit dhe krimit të organizuar.
Maqedonia e Veriut në mars të vitit 2020, pas zgjidhjes së mosmarrëveshjes me Republikën e Greqisë, me hyrjen në NATO arriti një nga qëllimet më të rëndësishme strategjike. Megjithatë, qëllimi i dytë strategjik i RMV mbetet i pazgjidhur edhe sot, e ai është hyrja në Bashkimin Evropian, duke qenë se negociatat për anëtarësim po përjetojnë një periudhë stagnimi për shkak të kundërshtimit të Bullgarisë.
Republika Italiane e njeh Maqedoninë e Veriut si një shtet thelbësor për stabilitetin e Ballkanit Perëndimor, një rajon i afërt me Italinë dhe me të cilin ka lidhje shumë të thella historike, politike, sociale dhe ekonomike. Në nivel të BE-së, qëndrimi italian ka qenë gjithmonë i qartë, Italia mbështet integrimin evropian të vendit, siç është vënë re në disa raste nga partneri maqedonas; dhe në momentet më të vështira Italia nuk e ka tërhequr asnjëherë mbështetjen e saj, duke mbetur e bindur për nevojën e fillimit sa më të shpejtë të negociatave të anëtarësimit.
Gjendja e marrëdhënieve politike ndërmjet Italisë dhe Maqedonisë së Veriut është e shkëlqyer dhe në vitet e fundit është duke u intensifikuar vazhdimisht. Këtë e tregon shpeshtësia dhe niveli më i lartë i takimeve dhe vizitave institucionale. Në këtë drejtim, duhet të përmendim: vizitën në Shkup të Ministres së Punëve të Brendshme Luciana Lamorgese më 30 nëntor 2021, pastaj vizita e Ministrit të Brendshëm të RMV-së Oliver Spasovski më 25 maj në Romë. Vizita e Ministrit të Bujqësisë së RMV Lupço Nikollovski tek kolegu i tij Stefano Patuanelli në Romë, më 28 dhe 29 prill. Vizita e kryetarit të Dhomës së Deputeteve Roberto Fico në Shkup, më 12 dhe 13 prill 2022, me rastin e takimit me kolegun e tij Talat Xhaferi. Së fundi, takimi ndërmjet kryeministrit Mario Draghi dhe kryeministrit Dimitar Kovaçevski, i mbajtur në Romë më 24 maj të këtij viti, rikonfirmoi marrëdhëniet e shkëlqyera mes dy vendeve dhe rëndësinë që ata i kushtojnë promovimit të stabilitetit dhe rritjes në Ballkanin Perëndimor dhe synimit për integrimin evropian të rajonit.
Gjithashtu duhet theksuar se muajt e fundit janë nënshkruar dy memorandume dypalëshe për forcimin e bashkëpunimit, gjegjësisht në fushën e bujqësisë dhe në fushën e luftimit të trafikut të drogës, pas memorandumit të bashkëpunimit të nënshkruar në vitin 2021 ndërmjet ANAC dhe Komisionit për parandalimin e korrupsionit në RMV.
